لاہور: ڈی ایس پی عثمان حیدر بیوی اور بیٹی کے قتل کے معاملے میں معطل، محکمانہ کارروائی کا آغاز

لاہور میں ڈی ایس پی عثمان حیدر کے ہاتھوں مبینہ طور پر بیوی اور بیٹی کے قتل کے سنگین معاملے پر پولیس نے بڑی کارروائی کرتے ہوئے ڈی ایس پی عثمان حیدر کو معطل کر دیا ہے، جس کا باضابطہ نوٹیفکیشن بھی جاری کر دیا گیا ہے۔

ذرائع کے مطابق لاہور پولیس کی جانب سے واقعے میں ڈی ایس پی عثمان حیدر کے ملوث ہونے سے متعلق رپورٹ سینٹرل پولیس آفس (سی پی او) کو ارسال کی گئی، جس کی روشنی میں انہیں معطل کیا گیا۔ پولیس حکام کے مطابق آئندہ مرحلے میں ڈی ایس پی عثمان حیدر کو محکمہ پولیس سے برخاست کیے جانے کا بھی امکان ہے۔تحقیقات کے مطابق ڈی ایس پی عثمان حیدر کی بیٹی کی لاش لاہور کے علاقے کاہنہ سے برآمد ہوئی تھی۔ تاہم کاہنہ پولیس کی جانب سے قتل کی دفعات کے تحت مقدمہ درج نہیں کیا گیا۔ پولیس نے پوسٹ مارٹم کے بعد صرف دفعہ 174 کے تحت کارروائی کی اور لاش کو لاوارث قرار دے کر تدفین کر دی گئی۔واقعے میں سنگین غفلت برتنے پر ایس ایچ او کاہنہ کو معطل کر دیا گیا ہے، جبکہ چوکی انچارج ذوالفقار اور اے ایس آئی اللہ رکھا کو بھی معطل کر دیا گیا ہے۔ذرائع کے مطابق کاہنہ پولیس کی جانب سے دفعہ 302 کے تحت مقدمہ درج نہ کرنا اور شواہد کو نظرانداز کرنا ایک بڑی کوتاہی قرار دی جا رہی ہے، جس پر اعلیٰ سطح پر مزید تحقیقات جاری ہیں۔پولیس حکام کا کہنا ہے کہ واقعے کی مکمل اور شفاف تحقیقات کی جا رہی ہیں اور ذمہ داروں کے خلاف قانون کے مطابق سخت کارروائی عمل میں لائی جائے گی