عظمیٰ خانم اور نورین نیازی کی نظربندی معطل کرنے کی استدعا مسترد

لاہور ہائیکورٹ نے بانی پی ٹی آئی کی ہمشیرہ ڈاکٹر عظمیٰ خانم اور نورین نیازی کی نظربندی کے خلاف دائر کردہ درخواستوں پر سماعت کرتے ہوئے نظر بندی کے نوٹیفکیشن کو فوری طور پر معطل کرنے کی استدعا مسترد کر دی ہے۔ جسٹس عبہر گل خان نے ان درخواستوں پر سماعت کی۔

عدالت نے کارروائی کے دوران متعلقہ فریقین کو نوٹسز جاری کرتے ہوئے اس معاملے پر باضابطہ جواب اور رپورٹ طلب کر لی ہے۔ سماعت کے دوران درخواست گزاروں کی جانب سے رانا مدثر عمر اور بیرسٹر تیمور ایڈووکیٹ پیش ہوئے، جبکہ پنجاب حکومت کی نمائندگی فرخ لودھی ایڈووکیٹ نے کی۔ وکیل صفائی نے مؤقف اختیار کیا کہ دونوں خواتین گھریلو خواتین ہیں اور ڈاکٹر عظمیٰ خانم کے خلاف درج ایک مقدمے میں ٹرائل کورٹ کی جانب سے پہلے ہی بے قصور قرار دی جا ہیں، جس کی مصدقہ کاپی بھی درخواست کے ساتھ لف ہے۔

درخواست میں ڈپٹی کمشنر کی جانب سے جاری کردہ نظربندی کے نوٹیفکیشن کو چیلنج کرتے ہوئے اسے کالعدم قرار دینے کی استدعا کی گئی تھی۔ نورین نیازی کی بیٹی سکینہ سمیت دیگر کی جانب سے دائر ان درخواستوں پر عدالت نے فوری معطلی کا حکم جاری کرنے سے گریز کرتے ہوئے فریقین سے جواب طلب کر لیا ہے۔