سندھ کابینہ کا بڑا فیصلہ: گندم کی اجرا قیمت میں نمایاں کمی

سندھ کابینہ نے سال 2025–26 کے لیے گندم ریلیز پالیسی میں نظرِ ثانی کی منظوری دیتے ہوئے گندم کی اجرا قیمت کم کر دی ہے۔ کابینہ اجلاس میں فیصلہ کیا گیا کہ سرکاری گندم فوری طور پر آٹا ملوں، چکیوں اور تاجروں کو فراہم کی جائے گی تاکہ مارکیٹ میں استحکام پیدا کیا جا سکے۔

وزیراعلیٰ سندھ کے مطابق 100 کلوگرام فی بوری گندم کی اجرا قیمت 8,000 روپے مقرر کی گئی ہے، جو اس سے قبل 9,500 روپے تھی۔ ان کا کہنا تھا کہ گندم کی بروقت ریلیز سے نہ صرف اس کے معیار کو برقرار رکھنے میں مدد ملے گی بلکہ سرکاری گوداموں میں ذخیرہ کرنے کی جگہ بھی خالی ہو سکے گی۔

ترجمان وزیراعلیٰ سندھ نے بتایا کہ کابینہ کا یہ فیصلہ مارکیٹ میں قیمتوں کے استحکام کو یقینی بنانے کے لیے کیا گیا ہے، جبکہ عوام کے لیے آٹے کی مناسب اور قابلِ برداشت قیمتیں یقینی بنانے کی کوششیں جاری ہیں۔

اجلاس میں فیصلہ کیا گیا کہ گندم کی قیمتوں کی کڑی نگرانی کے لیے سندھ کابینہ نے ایک ذیلی کمیٹی بھی تشکیل دے دی ہے۔ ذیلی کمیٹی مارکیٹ کی صورتحال کا جائزہ لے گی اور ضرورت پڑنے پر گندم کی اجرا قیمت میں رد و بدل سے متعلق سفارشات پیش کرے گی۔

سندھ کابینہ کے مطابق حکومت عوامی مفاد کے تحفظ اور اشیائے خورونوش کی قیمتوں پر قابو پانے کے لیے مؤثر اقدامات جاری رکھے گی۔