وزیر اعلیٰ کے پی کے سہیل آفریدی سمیت دیگر ملزمان کے خلاف اشتہاری کارروائی شروع

انسدادِ دہشت گردی عدالت اسلام آباد نے وزیر اعلیٰ خیبر پختونخوا سہیل آفریدی کے خلاف اشتہاری کارروائی کا آغاز کر دیا ہے۔

عدالت نے صوبائی وزیر مینا خان آفریدی اور شفیع اللہ جان اقبال آفریدی کے خلاف بھی اشتہاری کارروائی شروع کرنے کے احکامات جاری کیے ہیں۔انسدادِ دہشت گردی عدالت کے جج ابوالحسنات محمد ذوالقرنین نے مقدمے پر سماعت کی۔ عدالتی ریکارڈ کے مطابق وزیر اعلیٰ کے پی کے سہیل آفریدی اور دیگر ملزمان کے خلاف 26 نومبر کے احتجاج کے سلسلے میں تھانہ رمنا میں مقدمہ درج ہے۔سماعت کے دوران عدالت کو بتایا گیا کہ متعدد بار طلب کیے جانے کے باوجود نامزد ملزمان عدالت میں پیش نہیں ہوئے، جس پر عدالت نے قانونی تقاضوں کے تحت اشتہاری کارروائی کا حکم دیا۔عدالتی ذرائع کے مطابق اس سے قبل بھی انسدادِ دہشت گردی عدالت اسلام آباد وزیر اعلیٰ خیبر پختونخوا اور دیگر ملزمان کے خلاف تھانہ نون میں درج مقدمے میں اشتہاری کارروائی کا آغاز کر چکی ہے۔مزید کارروائی آئندہ سماعت پر کی جائے گی۔