امریکا کی ایران جنگ سے متاثرہ خلیجی ممالک کو 5 ارب ڈالر کے فنڈز کی پیشکش

امریکی حکومت نے ایران جنگ سے متاثرہ خلیجی ممالک کے توانائی کے بنیادی ڈھانچے (انفراسٹرکچر) کی بحالی اور تعمیرِ نو کے لیے 5 ارب ڈالر کے نئے ہنگامی فنڈ کی تجویز دی ہے۔ امریکی اخبار ‘وال اسٹریٹ جرنل’ کی رپورٹ کے مطابق یہ جامع منصوبہ سعودی عرب، متحدہ عرب امارات (UAE) اور دیگر خلیجی ممالک کے ساتھ اعلیٰ سطح پر زیرِ بحث ہے۔ اس مجوزہ امریکی فنڈ کا بنیادی مقصد جنگ کے دوران ڈرون اور میزائل حملوں سے تباہ ہونے والی تیل و گیس کی پائپ لائنوں، ریفائنریوں اور پروسیسنگ پلانٹس کی فوری تعمیرِ نو کرنا ہے۔

علاوہ ازیں، اس منصوبے کے ذریعے خلیجی ممالک کو تیل اور گیس کی ترسیل کے لیے متبادل بری اور بحری راستے فراہم کرنا ہے تاکہ آبنائے ہرمز پر ان کا انحصار نمایاں طور پر کم کیا جا سکے۔ امریکی اور مشرقِ وسطیٰ کے حکام کا کہنا ہے کہ گزشتہ سات ماہ سے جاری اس شدید جنگی تنازع نے نہ صرف عالمی توانائی کی منڈیوں کو تباہی کے دہانے پر پہنچا دیا ہے بلکہ خطے کے اہم ترین انرجی انفراسٹرکچر کو بھی شدید نقصان پہنچایا ہے، جس کی مکمل بحالی پر عرب ممالک کے لیے اربوں ڈالر کے بھاری اخراجات متوقع ہیں۔