وائٹ ہاؤس میں رسائی پر پابندی، میڈیا اداروں کا عدالت سے رجوع کرنے کا اعلان

امریکی صدر ڈونلڈ ٹرمپ کی انتظامیہ کی جانب سے وائٹ ہاؤس میں رسائی پر پابندی کے خلاف بین الاقوامی خبر رساں اداروں سی این این (CNN)، ایم ایس ناؤ (MS Now) اور پولیٹیکو (Politico) نے مشترکہ طور پر عدالت سے رجوع کرنے کا اعلان کیا ہے۔ تینوں میڈیا اداروں نے ایک مشترکہ بیان جاری کرتے ہوئے کہا ہے کہ وہ اپنے صحافیوں کی وائٹ ہاؤس تک رسائی بحال کرانے اور پریس پاسز کی منسوخی کے خلاف امریکی آئین کی فرسٹ امینڈمنٹ (پہلی ترمیم) کے تحت مقدمہ دائر کر رہے ہیں۔

مشترکہ اعلامیے میں موقف اختیار کیا گیا ہے کہ وائٹ ہاؤس نے بغیر کسی پیشگی اطلاع یا قانونی کارروائی کے ان کے صحافیوں کے پاسز منسوخ کیے، جو کہ آزادیٔ صحافت اور بنیادی آئینی حقوق پر براہِ راست حملہ ہے۔ نیوز اداروں نے واضح کیا کہ حکومت یا انتظامیہ یہ طے نہیں کر سکتی کہ میڈیا کیا رپورٹ یا شائع کرے۔ واضح رہے کہ 19 ستمبر کو ان تینوں اداروں کے صحافیوں کو وائٹ ہاؤس میں داخلے سے روکتے ہوئے ان کے پاسز غیر فعال اور ضبط کر لیے گئے تھے، جسے اب قانونی طور پر چیلنج کیا جا رہا ہے۔