سانحۂ پشاور ، بلاول بھٹو زرداری کا شہداء کو خراجِ عقیدت

پاکستان پیپلز پارٹی کے چیئرمین بلاول بھٹو زرداری نے سانحۂ آرمی پبلک اسکول پشاور کو 11 سال مکمل ہونے کے موقع پر اپنے پیغام میں شہید ہونے والے معصوم طلبہ اور اساتذہ کو زبردست خراجِ عقیدت پیش کیا۔

بلاول بھٹو زرداری نے کہا کہ سانحۂ اے پی ایس قوم کے ضمیر پر ایک ایسا زخم ہے جو کبھی مندمل نہیں ہو سکتا۔ ان کا کہنا تھا کہ یہ سانحہ ایک اجتماعی غم ہے جس نے دہشت گردی کے خلاف پاکستان کے عزم کو نئی طاقت اور نئی سمت عطا کی۔

چیئرمین پیپلز پارٹی نے کہا کہ 16 دسمبر کی تاریخ ہمیں یاد دلاتی ہے کہ دہشت گردی کا نہ کوئی مذہب ہے، نہ انسانیت سے کوئی تعلق اور نہ ہی اس کا کوئی جواز ہے۔ انہوں نے زور دیا کہ دہشت گردی کے خلاف ہمارا جواب ہمیشہ اتحاد، انصاف اور اپنے بچوں کے تحفظ کے غیر متزلزل عزم پر مبنی ہونا چاہیے۔

بلاول بھٹو زرداری نے واضح کیا کہ پاکستان پیپلز پارٹی ملک میں امن، تعلیم اور قانون کی حکمرانی کے لیے پرعزم ہے اور سانحۂ اے پی ایس کے شہداء کے خاندانوں کے ساتھ شانہ بشانہ کھڑی ہے۔

انہوں نے کہا کہ ہم ایک ایسے پاکستان کے لیے جدوجہد جاری رکھیں گے جہاں ہر بچہ بلا خوف و خطر تعلیم حاصل کر سکے، آگے بڑھ سکے اور اپنے خواب پورے کر سکے۔

آخر میں بلاول بھٹو زرداری نے کہا کہ ہم سانحۂ آرمی پبلک اسکول کے شہداء کو انتہائی عقیدت کے ساتھ سلام پیش کرتے ہیں اور ان کی عظیم قربانیاں ہمیشہ ہمیں ایک محفوظ، مضبوط اور پُرامن پاکستان کی راہ دکھاتی رہیں گی۔