سومنات کا حوالہ بار بار آنے کے لیے استعمال کیا، ہم پرامن رہیں گے: جنید اکبر کی وضاحت

پاکستان تحریک انصاف (پی ٹی آئی) کے سینئر رہنما اور رکنِ قومی اسمبلی جنید اکبر خان نے سوشل میڈیا پلیٹ فارم ایکس (X) پر جاری ایک بیان کے ذریعے اپنے حالیہ متنازع بیان پر وضاحت جاری کر دی ہے। انہوں نے حکمران جماعت نون لیگ کے حامی صحافیوں اور ناقدین پر الزام عائد کیا کہ ان کی حالیہ تقریر کو بلاجواز غلط رنگ دیا جا رہا ہے۔ جنید اکبر کے مطابق ان کی پارٹی پہلے بھی پرامن تھی، اب بھی ہے اور آئندہ بھی آئین کے دائرے میں رہتے ہوئے پرامن رہے گی۔

انہوں نے وضاحت کی کہ تقریر کے دوران “سومنات” کا حوالہ بار بار واپس آنے اور مسلسل جدوجہد کے استعارے کے طور پر استعمال کیا گیا تھا۔ انہوں نے مزید کہا کہ ہم نے پہلے بھی لاشیں اٹھائی ہیں لیکن تشدد کے راستے کو نہیں اپنایا۔ جنید اکبر نے واضح الفاظ میں کہا کہ جو شخص پرامن نہیں ہوگا، وہ عمران خان کا سپاہی یا تحریک کا حصہ نہیں ہو سکتا۔ انہوں نے پارٹی کارکنان کو ہدایت کی کہ وہ احتجاج کے دوران ایسے عناصر پر کڑی نظر رکھیں جو تحریک کو نقصان پہنچانے کی کوشش کر سکتے ہیں۔ پی ٹی آئی رہنما نے عمران خان کے مؤقف کا اعادہ کرتے ہوئے کہا کہ یہ ملک اور افواجِ پاکستان سب کے ہیں، اور آخر میں ملک کی حفاظت، امن اور آئین و قانون کی حکمرانی کی دعا کی۔