امیرِ اہلِ سنت قاضی نثار احمد پر قاتلانہ حملہ،دہشت گرد نیٹ ورک بے نقاب

امیرِ اہلِ سنت قاضی نثار احمد پر 5 اکتوبر 2025 کو ہونے والے قاتلانہ حملے سے متعلق گلگت بلتستان پولیس نے اہم پیش رفت سے آگاہ کر دیا۔ انسپکٹر جنرل پولیس گلگت بلتستان کی زیرِ صدارت ایک اہم پریس کانفرنس میں حملے میں ملوث دہشت گرد نیٹ ورک کو بے نقاب کرنے کا اعلان کیا گیا۔

پریس بریفنگ کے دوران بتایا گیا کہ گلگت بلتستان کی قانون نافذ کرنے والی ایجنسیوں کی مؤثر اور بروقت کارروائیوں کے نتیجے میں دو مرکزی ملزمان کو گرفتار کر لیا گیا ہے، جنہوں نے دورانِ تفتیش اعترافِ جرم بھی کر لیا ہے۔

پولیس کے مطابق اس دہشت گردانہ حملے میں مجموعی طور پر 11 افراد شامل تھے، جن میں دو سہولت کار اور نو حملہ آور شامل ہیں۔ جوابی کارروائی کے دوران ایک دہشت گرد موقع پر ہی ہلاک ہو گیا۔

آئی جی گلگت بلتستان نے بتایا کہ تمام مفرور ملزمان کی شناخت مکمل کر لی گئی ہے اور ان کی گرفتاری کے لیے بھرپور اور مسلسل کوششیں جاری ہیں۔ ان کا کہنا تھا کہ یہ کامیابی پولیس اور دیگر سیکیورٹی اداروں کی مشترکہ کوششوں کا نتیجہ ہے۔

انسپکٹر جنرل پولیس نے واضح کیا کہ گلگت بلتستان میں دہشت گردی کے لیے کوئی جگہ نہیں اور عوام کے جان و مال کے تحفظ کے لیے تمام ادارے مکمل ہم آہنگی کے ساتھ کام کر رہے ہیں