اختیارات کی نچلی سطح تک منتقلی سے عوام کے مسائل حل ہوں گے، خالد مقبول صدیقی

متحدہ قومی موومنٹ (ایم کیو ایم) پاکستان کے سربراہ ڈاکٹر خالد مقبول صدیقی نے کہا ہے کہ حقيقي جمہوریت کے ثمرات تب ہی عام آدمی تک پہنچ سکتے ہیں جب اختیارات کو نچلی سطح تک منتقل کیا جائے۔ اپنے جاری کردہ بیان میں خالد مقبول صدیقی نے کہا کہ آج کا دن ایک عوامی ریفرنڈم کی حیثیت رکھتا ہے جہاں کراچی کے غیور شہری اپنے حقوق کے لیے سڑکوں پر نکل کر خود کو گنوائیں گے بھی اور منوائیں گے بھی۔ ان کا کہنا تھا کہ عوام کسی کے غلام نہیں ہیں اور قوم کی تقدیر بدلنے کے لیے انہیں خود میدانِ عمل میں آنا ہوگا۔ ایم کیو ایم اقتدار کو اعلیٰ ایوانوں سے نکال کر گلی محلوں اور عام پاکستانی کی دہلیز تک پہنچا کر رہے گی۔

اس موقع پر ایم کیو ایم کے سینئر رہنما فاروق ستار نے بات کرتے ہوئے کہا کہ ملک میں نئے انتظامی یونٹس کا قیام اب وقت کی اہم ترین ضرورت اور ناگزیر ہو چکا ہے۔ انہوں نے دعویٰ کیا کہ صوبے میں 6 نئے انتظامی یونٹس بننے جا رہے ہیں جن کے اختیارات لاڑکانہ، سکھر، نواب شاہ اور کراچی کے عوام کے پاس ہوں گے اور پیپلز پارٹی کا اقتدار کا دور اب ختم ہونے کے قریب ہے۔ فاروق ستار نے سندھ حکومت پر شدید تنقید کرتے ہوئے کہا کہ صوبہ بدانتظامی کے لحاظ سے ملک کے باقی تمام صوبوں سے آگے نکل چکا ہے، اور جب گورننس مکمل طور پر تباہ ہو جائے تو انتقالِ اقتدار ہی واحد راستہ بچتا ہے۔