کراچی: پانی کی شدید قلت، شہر رہنے کے قابل نہیں، مصطفی کمال

کراچی: وفاقی وزیر صحت سید مصطفی کمال نے کراچی کی خراب صورتحال پر کھل کر بات کرتے ہوئے کہا ہے کہ بدقسمتی سے کراچی اب لوگوں کے رہنے کی جگہ نہیں رہا۔ شہر میں پینے کے پانی کی کمی ہے اور لوگ ہزاروں روپے دے کر ٹینکر خریدنے پر مجبور ہیں۔ انہوں نے پانی کے کاروبار میں بڑے بڑے افراد کی ملوثیت پر بھی تشویش ظاہر کی۔

کراچی چیمبر میں خطاب اور میڈیا سے بات چیت میں مصطفی کمال نے موجودہ میئر کا نام لیے بغیر کہا کہ جب وہ میئر تھے تو کراچی دنیا کے 12 تیزی سے ترقی کرنے والے شہروں میں شامل تھا، جبکہ آج بچے گٹر میں گر کر مر رہے ہیں اور شہری زندگی شدید متاثر ہو چکی ہے۔

انہوں نے صوبوں اور وفاق کے مالی معاملات پر بھی تنقید کی اور کہا کہ صوبے این ایف سی کے تحت 56 فیصد حصہ حاصل کرتے ہیں، جبکہ سندھ کو پچھلے 17 سالوں میں 20 ہزار ارب روپے مل چکے ہیں، مگر یہ پیسہ نچلی سطح تک منتقل نہیں ہوتا۔

مصطفی کمال نے 28ویں آئینی ترمیم کی بحالی کا مطالبہ بھی دہرایا اور کہا کہ ایم کیو ایم واحد جماعت ہے جس نے اپنے لیڈر کو فارغ کیا۔

ڈریپ میں ماضی کی کرپشن کے حوالے سے بات کرتے ہوئے انہوں نے کہا کہ اب ادارہ ڈیجیٹلائز کر دیا گیا ہے اور امریکی یا یورپی سند رکھنے والی کوئی بھی پروڈکٹ صرف 20 دن میں رجسٹر ہو جاتی ہے۔