پاکستان اور کویت کے درمیان پٹرولیم شعبے میں تعاون مزید مضبوط کرنے پر اتفاق

وفاقی وزیر پٹرولیم علی پرویز ملک نے اپنے وفد کے ہمراہ کویت کا دورہ کیا، جہاں انہوں نے کویت کے وزیرِ تیل طارق سلیمان الرومی سے اعلیٰ سطحی ملاقات کی۔

اعلامیے کے مطابق ملاقات میں کویت پیٹرولیم کارپوریشن کے سی ای او شیخ نواف الصبا اور کویت فارن پیٹرولیم ایکسپلوریشن کمپنی کی اعلیٰ قیادت بھی شریک تھے۔ اجلاس میں دونوں ممالک نے پٹرولیم شعبے میں نئی شراکت داری کے امکانات پر غور کیا اور توانائی کے شعبے میں قریبی رابطے برقرار رکھنے کے عزم کا اعادہ کیا۔

وفاقی وزیر پٹرولیم علی پرویز ملک نے کہا کہ پاکستان اور کویت کے تعلقات دہائیوں پر محیط ہیں اور باہمی اعتماد پر مبنی ہیں۔

کویتی وزیرِ تیل نے پاکستانی وفد کے اعزاز میں ظہرانہ بھی دیا، جس میں دو طرفہ تعلقات اور پٹرولیم شعبے میں تعاون کے فروغ پر بات چیت کی گئی۔