ایل پی جی گھریلو سلنڈر پر 50 فیصد سے زائد ٹیکس وصولی کا انکشاف

اصل قیمت 1621 روپے، سرکاری نرخ 2466 روپے، مارکیٹ میں 3800 روپے تک فروخت

اسلام آباد/راولپنڈی: سرکاری دستاویزات میں انکشاف ہوا ہے کہ ایل پی جی کے گھریلو سلنڈر پر 50 فیصد سے زائد ٹیکسز اور چارجز وصول کیے جا رہے ہیں، جس کے باعث صارفین پر اضافی بوجھ پڑ رہا ہے۔دستاویزات کے مطابق 11.8 کلو گرام ایل پی جی گھریلو سلنڈر کی اصل قیمت 1621 روپے 82 پیسے ہے، جبکہ اس کی سرکاری قیمت 2466 روپے مقرر کی گئی ہے۔ سرکاری ریکارڈ کے مطابق ایل پی جی سلنڈر پر بھاری ٹیکسز عائد ہیں۔دستاویزات میں بتایا گیا ہے کہ 11.8 کلو گرام کے گھریلو سلنڈر پر مجموعی طور پر 844 روپے ٹیکسز کی مد میں وصول کیے جا رہے ہیں، جبکہ صارفین سے فی کلو 71 روپے 52 پیسے ٹیکس وصول کیا جا رہا ہے۔

تفصیلات کے مطابق:

پٹرولیم لیوی: 55 روپے فی سلنڈر

جی ایس ٹی: 301 روپے 84 پیسے

مارکیٹنگ، ڈسٹری بیوشن اور ڈیلر مارجن: 413 روپے

مختلف مارجنز پر 18 فیصد جی ایس ٹی: 74 روپے 34 پیسے

دستاویزات کے مطابق آئل اینڈ گیس ریگولیٹری اتھارٹی (اوگرا) نے ایل پی جی کمپنیوں کو سرکاری نرخوں پر سختی سے عملدرآمد اور پلانٹ پر پرائس ٹیکس لگانے کی ہدایت کر رکھی ہے۔تاہم اوگرا کی ہدایات کے باوجود گھریلو ایل پی جی سلنڈر پر 1200 روپے سے زائد فی سلنڈر اضافی وصولی جاری ہے، جبکہ مارکیٹ میں فی سلنڈر 3700 سے 3800 روپے تک فروخت کیا جا رہا ہے۔ذرائع کے مطابق جڑواں شہروں اسلام آباد اور راولپنڈی میں بھی ایل پی جی کے سرکاری نرخوں پر عملدرآمد ایک بڑا چیلنج بن چکا ہے۔