ڈیجیٹل اثاثوں کے مؤثر ضابطے کے لیے عالمی تعاون ناگزیر ہے: بلال بن ثاقب

وزیراعظم کے معاونِ خصوصی بلال بن ثاقب نے اقوامِ متحدہ (UN) کے ہیڈکوارٹرز میں ویڈیو لنک کے ذریعے خطاب کرتے ہوئے تاکید کی ہے کہ ڈیجیٹل اثاثوں کے مؤثر ضابطے اور ریگولیشن کے لیے عالمی تعاون ناگزیر ہو چکا ہے۔ ان کا کہنا تھا کہ ڈیجیٹل اثاثے، ٹوکنائزیشن اور بلاک چین ٹیکنالوجی ترقی پذیر معیشتوں کے لیے معاشی ترقی کے نئے مواقع فراہم کر سکتی ہے، تاہم ان کے مکمل فوائد کے حصول کے لیے ایک واضح، متوازن اور مؤثر ریگولیٹری فریم ورک تشکیل دینا انتہائی ضروری ہے۔

بلال بن ثاقب نے عالمی مالیاتی نظام پر روشنی ڈالتے ہوئے بتایا کہ دنیا بھر میں تقریباً 1 ارب 40 کروڑ افراد اب بھی رسمی مالیاتی نظام سے محروم ہیں، جبکہ مہنگی ترسیلاتِ زر اور پیچیدہ نظام عام شہریوں کے لیے مشکلات کا باعث ہیں۔ ڈیجیٹل فنانس مالی شمولیت بڑھانے اور کم لاگت ترسیلات کی فراہمی میں کلیدی کردار ادا کر سکتا ہے۔ انہوں نے کہا کہ ٹوکنائزیشن سے قابلِ تجدید توانائی و بنیادی ڈھانچے میں سرمایہ کاری کے نئے دروازے کھلیں گے اور بلاک چین سے سرکاری اخراجات میں شفافیت آئے گی، تاہم خوف پر مبنی سخت ریگولیشنز سے بچتے ہوئے ترقی پذیر ممالک کی صلاحیتوں میں اضافہ اور مشترکہ عالمی فریم ورک کا قیام وقت کا اہم تقاضا ہے۔