نائن الیون کے زخم آج بھی تازہ، دہشتگردی کے خلاف جنگ جاری رہے گی: ٹرمپ

واشنگٹن: امریکی صدر ڈونلڈ ٹرمپ نے پینٹاگون میں 11 ستمبر حملوں کی یادگاری تقریب سے خطاب کرتے ہوئے کہا ہے کہ امریکا 9/11 کے المناک واقعات اور ان کے شہدا کو کبھی فراموش نہیں کر سکتا، اور ملک کی حفاظت کے لیے ہر ممکن قدم اٹھایا جائے گا۔

نائن الیون کی برسی کی تقریب کے موقع پر خطاب کرتے ہوئے امریکی صدر نے دہشت گردی کے خلاف جاری عالمی مہم، ملکی سلامتی اور خطے میں ایران کے جوہری پروگرام پر اپنے سخت گیر موقف کا اعادہ کیا۔

 صدر ٹرمپ نے کہا کہ 11 ستمبر کے حملوں میں ہزاروں بے گناہ افراد کی جانیں گئیں اور امریکا آج بھی اسی عزم، وفاداری اور یکسوئی کے ساتھ دہشت گردی کے خاتمے کی جنگ لڑ رہا ہے، کیونکہ ملک و قوم کا دفاع کرنے کے سوا کوئی دوسرا راستہ نہیں۔ انہوں نے دعویٰ کیا کہ تاریخی چیلنجز کے باوجود امریکا آج پہلے سے کہیں زیادہ محفوظ، متحد اور غیر معمولی طور پر مضبوط ہو چکا ہے۔ ایران کے حوالے سے بات کرتے ہوئے امریکی صدر نے واضح کیا کہ تہران کو کسی بھی صورت میں نچلی یا اعلیٰ سطح پر جوہری ہتھیار بنانے کی اجازت نہیں دی جائے گی اور ایران کبھی ایٹمی صلاحیت حاصل نہیں کر سکے گا۔ڈونلڈ ٹرمپ نے ایران کو دنیا میں دہشت گردی کا سب سے بڑا مالی اور سیاسی سرپرست قرار دیتے ہوئے کہا کہ امریکا عالمی سطح پر دہشت گردی کے نیٹ ورکس اور ان کے سہولت کاروں کے خلاف اپنی جنگ بلاحجھک جاری رکھے گا۔