ٹرمپ نے حوثیوں کے خلاف کارروائی کی سعودی درخواست مسترد کر دی: امریکی میڈیا

واشنگٹن: امریکی صدر ڈونلڈ ٹرمپ نے یمن کے حوثی باغیوں کے خلاف فوجی کارروائی کے لیے سعودی ولی عہد شہزادہ محمد بن سلمان کی درخواست کو مسترد کر دیا ہے۔

امریکی نیوز ویب سائٹ ‘ایگزیوس’ (Axios) کی رپورٹ کے مطابق بحیرہ احمر میں حوثیوں کی جانب سے بڑھتے ہوئے سیکیورٹی خطرات کے پیشِ نظر سعودی ولی عہد نے صدر ٹرمپ سے دو بار ٹیلی فون پر رابطہ کیا۔ بات چیت کے دوران محمد بن سلمان نے واشنگٹن پر زور دیا کہ وہ حوثیوں کے خلاف براہِ راست ملٹری ایکشن لے، تاہم صدر ٹرمپ نے یمن میں ایک اور نیا محاذ کھولنے سے صاف انکار کر دیا۔

رپورٹ میں انکشاف کیا گیا ہے کہ امریکی صدر نے اپنی افواج کو تمام تر توجہ ایران اور آبنائے ہرمز پر مرکوز رکھنے کی ہدایت کی ہے۔ تاہم، طے شدہ حکمتِ عملی کے تحت امریکا حوثیوں کے خلاف سعودی عرب کو انٹیلی جنس اور اہداف سے متعلق معلومات کی فراہمی جاری رکھے گا، جبکہ بحیرہ احمر میں جہاز رانی کی آزادی اور تحفظ کے لیے علاقائی اتحادیوں کو پیش پیش رکھا جائے گا۔

‘ایگزیوس’ کے مطابق گزشتہ روز امریکی سینٹرل کمانڈ کے سربراہ ایڈمرل بریڈ کوپر نے بھی ہنگامی بنیادوں پر سعودی عرب کا دورہ کیا، جہاں انہوں نے دفاعی حکام سے اہم ملاقاتیں کیں۔ دوسری جانب، وائٹ ہاؤس اور واشنگٹن میں واقع سعودی سفارت خانے نے اس معاملے پر باضابطہ تبصرہ کرنے سے معذرت کر لی ہے۔

واضح رہے کہ یہ پیش رفت یمن کی حوثی جماعت انصار اللہ کی جانب سے سعودی عرب میں کیے گئے حالیہ حملوں کے بعد سامنے آئی ہے، جن میں خواتین اور بچوں سمیت 73 افراد زخمی ہو گئے تھے۔