سڈنی حملہ خوفناک، حملہ آور کو روکنے والا شہری بہادر اور قابل احترام: ٹرمپ

امریکی صدر ڈونلڈ ٹرمپ نے آسٹریلیا کے شہر سڈنی میں پیش آنے والے فائرنگ کے واقعے کی شدید الفاظ میں مذمت کی ہے۔ وائٹ ہاؤس میں کرسمس تقریب سے خطاب کرتے ہوئے صدر ٹرمپ نے بونڈائی بیچ پر لوگوں پر حملے کو خوفناک قرار دیا اور کہا کہ مذہبی تہوار منانے والے افراد کو کسی تشویش کی ضرورت نہیں، لوگ فخر کے ساتھ تہوار منائیں۔

صدر ٹرمپ نے واقعے کے دوران حملہ آور کو روکنے والے شخص کو بہادر اور قابل احترام قرار دیا، جس نے کئی لوگوں کی جانیں بچائیں۔ آسٹریلوی میڈیا کے مطابق حملہ آور کو وہاں موجود ایک شہری نے اپنی جان پر کھیل کر پکڑا اور اس کا اسلحہ چھین کر متعدد افراد کی جانیں محفوظ بنائیں۔

اس بہادر شہری کی شناخت 43 سالہ احمد ال احمد کے طور پر ہوئی ہے، جو سڈنی میں پھل فروخت کرتے ہیں اور دو بچوں کے والد ہیں۔

صدر ٹرمپ نے شام میں امریکی فوجیوں پر حملے کے حوالے سے بھی کہا کہ یہ حملہ داعش نے کیا، نہ کہ شامی حکومت، اور حملہ آور کو بھاری نقصان اٹھانا پڑے گا۔

ادھر امریکی وزیر خارجہ مارکو روبیو نے بھی سڈنی حملے کی شدید مذمت کی اور کہا کہ یہود دشمنی کا اس دنیا میں کوئی مقام نہیں۔ انہوں نے متاثرین، یہودی کمیونٹی اور آسٹریلیا کے عوام کے ساتھ اپنی دعائیں شیئر کیں۔