سعودی دارالحکومت کے سکولوں میں ایک ہفتے تک آن لائن کلاسز کا فیصلہ

سعودی عرب کے دارالحکومت ریاض میں واقع کنگ خالد انٹرنیشنل ایئرپورٹ پر ہونے والے حالیہ میزائل حملے کے بعد سیکورٹی اور شہریوں کے تحفظ کو مدنظر رکھتے ہوئے شہر کے تمام اسکولوں میں ایک ہفتے کے لیے آن لائن تدریسی عمل اور ورچوئل کلاسز شروع کرنے کا فیصلہ کیا گیا ہے۔ سعودی وزارتِ تعلیم کی جانب سے والدین کو موصول ہونے والے مراسلے اور ہدایات کے مطابق دارالحکومت کے تمام سرکاری و نجی اسکولوں میں اس پورے ہفتے تمام تر تعلیمی اور تدریسی سرگرمیاں آن لائن پورٹل اور ڈسٹنس لرننگ کے ذریعے جاری رہیں گی۔

رپورٹ کے مطابق ایک ماہ سے بھی کم عرصے کے دوران یہ دوسرا موقع ہے کہ ایئرپورٹ اور دارالحکومت کے اطراف سیکیورٹی کی ہنگامی صورتحال کے باعث اسکولوں کو آن لائن تعلیم پر منتقل کیا گیا ہے۔ واضح رہے کہ ریاض کے کنگ خالد انٹرنیشنل ایئرپورٹ کے ٹرمینل 4 کو ایک بار پھر نشانہ بنایا گیا، جس کے بعد ایئرپورٹ کی عمارت اور حصوں میں لگنے والی آگ پر قابو پانے کے لیے ہنگامی ریسکیو اور فائر فائٹنگ کارروائیاں کی گئیں۔ سول ایوی ایشن اتھارٹی اور سیکیورٹی ادارے ایئرپورٹ تنصیبات کو پہنچنے والے نقصان اور حفاظت کا تفصیلی جائزہ لے رہے ہیں۔