ٹرمپ کا روس اور یوکرین کے درمیان توانائی جنگ بندی کا اعلان، زیلینسکی کا خیرمقدم

امریکی صدر ڈونلڈ ٹرمپ نے روس اور یوکرین کے درمیان جاری طویل جنگ کے تناظر میں دونوں ممالک کے توانائی کے بنیادی ڈھانچے پر حملے روکنے کے لیے ایک فوری جنگ بندی کا اعلان کر دیا ہے، تاہم ماسکو کی جانب سے فی الحال اس معاہدے پر عمل درآمد کی باضابطہ تصدیق نہیں کی جا سکی۔ غیر ملکی میڈیا رپورٹس کے مطابق اس مجوزہ جنگ بندی کے تحت روس اور یوکرین ایک دوسرے کے پاور پلانٹس، بجلی کی ترسیل کے نظام اور توانائی کی دیگر اہم تنصیبات کو فضائی یا میزائل حملوں کا نشانہ نہیں بنائیں گے۔

رپورٹس میں ذرائع کے حوالے سے بتایا گیا ہے کہ یہ توانائی جنگ بندی فوری طور پر مؤثر ہو چکی ہے، جس کا بنیادی مقصد جنگ زدہ علاقوں میں توانائی کے نظام کو تباہی سے بچانا اور سخت ترین حالات میں شہریوں کو بجلی اور گیس کی بلا تعطل فراہمی یقینی بنانا ہے۔ دوسری جانب، یوکرین کے صدر ولادیمیر زیلنسکی نے امریکی صدر کے اس اعلان کا خیرمقدم کرتے ہوئے اسے ایک مثبت پیش رفت قرار دیا ہے۔ ایک میڈیا ادارے سے گفتگو کرتے ہوئے زیلنسکی نے دوٹوک مؤقف اپنایا کہ اگر روس یوکرین کے توانائی کے بنیادی ڈھانچے پر حملے روکتا ہے تو یوکرین بھی جوابی کارروائی کے طور پر روسی آئل ریفائنریز کو نشانہ بنانا بند کر دے گا۔ انہوں نے کہا کہ اگر صدر ٹرمپ اور روسی صدر ولادیمیر پیوٹن کے درمیان اس معاملے پر کوئی مفاہمت طے پاتی ہے تو جنگ بندی کے آغاز کی واضح تاریخ بتائی جائے، کیونکہ یوکرین اس پر عمل درآمد کے لیے پوری طرح تیار ہے۔