آزادی یا موت کے نعرے آئین کے خلاف ہیں، ریاست کو بلیک میل نہیں کیا جا سکتا: وفاقی وزیر

وفاقی وزیر اور پاکستان مسلم لیگ (ن) خیبرپختونخوا کے صدر امیر مقام نے وزیراعلیٰ خیبرپختونخوا سہیل آفریدی کے کوہاٹ میں دیے گئے بیان پر سخت ردعمل دیتے ہوئے کہا ہے کہ آزادی یا موت جیسے نعرے آئین اور قانون کے منافی ہیں اور ریاست کو بلیک میل کرنے کی سیاست اب نہیں چلے گی۔

امیر مقام نے کہا کہ وزیراعلیٰ خیبرپختونخوا کی تقریر حقائق سے کٹی ہوئی اور ناکامیوں پر پردہ ڈالنے کی ناکام کوشش ہے۔ ان کے مطابق کوہاٹ میں ایک بار پھر پی ٹی آئی کو عوامی سطح پر مسترد کر دیا گیا اور عوام اب محض دعووں کے بجائے کارکردگی چاہتے ہیں۔

وفاقی وزیر نے کہا کہ نوجوانوں کو ایک بار پھر لاشوں اور کفن کی سیاست کی طرف دھکیلا جا رہا ہے، حالانکہ 2014، 2018 اور 2022 میں سڑکوں کی سیاست نے ملک کو شدید نقصان پہنچایا۔ ان کا کہنا تھا کہ ذاتی حملے ناکامی کا ثبوت ہیں جبکہ مریم نواز آئینی اور منتخب وزیراعلیٰ ہیں اور پنجاب میں پولیس اور صحت کے شعبے میں اصلاحات ان کی اولین ترجیح ہے۔

انہوں نے پی ٹی آئی دور پر تنقید کرتے ہوئے کہا کہ آئی ایم ایف کو خط لکھ کر ملک کو ڈیفالٹ کے قریب کس نے پہنچایا، 2018 سے 2022 تک تاریخی قرضے اور معاشی بحران نالائقی کا نتیجہ تھے۔ ان کے مطابق زیرو کرپشن کے دعوؤں کے باوجود بی آر ٹی، صحت کارڈ، بلین ٹری اور گندم اسکینڈلز نیب اور عدالتی رپورٹس کا حصہ ہیں۔

امیر مقام کا کہنا تھا کہ خیبرپختونخوا میں منصوبوں کے اعلانات تو بہت ہوئے مگر تکمیل نہ ہونے کے برابر ہے، صوبے میں بے روزگاری عروج پر ہے اور نوجوان احتجاج پر مجبور ہیں۔ انہوں نے کہا کہ سیاست آئین اور پارلیمان کے ذریعے ہوتی ہے، تشدد اور نفرت کے نعروں سے نہیں، جبکہ آزاد میڈیا جمہوریت کی بنیاد ہے جسے دبایا نہیں جا سکتا۔