روس اور یوکرین کے درمیان مذاکرات: ڈائریکٹر سی آئی اے کا فعال کردار ادا کرنے کا امکان

بین الاقوامی اخبار ’فنانشل ٹائمز‘ نے اپنی ایک رپورٹ میں دعویٰ کیا ہے کہ امریکی حکومت روس اور یوکرین کے درمیان جاری جنگ کے خاتمے اور امن مذاکرات میں اپنے خفیہ ادارے ‘سی آئی اے’ (CIA) کے ڈائریکٹر جان ریٹکلف کو مزید فعال اور بنیادی کردار دینے پر غور کر رہی ہے۔ رپورٹ کے مطابق امریکی حکام نے اپنے یورپی ہم منصبوں کو آگاہ کیا ہے کہ واشنگٹن سفارتی کوششوں کو مزید موثر بنانے کے لیے سی آئی اے چیف کا دائرہ اختیار بڑھا سکتا ہے، جبکہ وائٹ ہاؤس کے خصوصی ایلچی اسٹیو وٹکوف اور جیرڈ کشنر کی ان مذاکرات میں براہ راست شمولیت محدود کی جا سکتی ہے۔

دوسری جانب، سی آئی اے کی ترجمان لز لائنس نے فنانشل ٹائمز کی اس رپورٹ کو فوراً اور سختی سے مسترد کرتے ہوئے اسے محض قیاس آرائی اور غلط قرار دیا ہے۔ تا ہم بین الاقوامی سفارتی تجزیہ کاروں کا کہنا ہے کہ اگر واشنگٹن انتظامیہ کی جانب سے یہ پالیسی تبدیلی عمل میں لائی جاتی ہے، تو جان ریٹکلف کی شمولیت سے روس اور یوکرین کے درمیان جنگ بندی اور مستقل امن کے قیام کے لیے جاری امریکی سفارتی کوششوں کو ایک نیا عسکری و انٹیلی جنس رخ مل سکتا ہے۔