امریکی محکمہ محنت نے کگنیزنٹ کے لیے نئے گرین کارڈز (پرم) کا پروسیس معطل کر دیا

امریکی محکمہ محنت (US Department of Labor) نے نامور آئی ٹی سروسز کمپنی ‘کگنیزنٹ’ (Cognizant) اور کلاؤڈ ڈیٹا کمپنی ‘کلاؤڈیرا’ (Cloudera) کے لیے نئے گرین کارڈ کی درخواستوں کے پہلے مرحلے یعنی ‘پرم ‘ (PERM – Permanent Labor Certification) کے پروسیسنگ فلنگ کو عارضی طور پر معطل کر دیا ہے۔ یہ سخت قدم امریکی انتظامیہ اور وائٹ ہاؤس فراڈ ٹاسک فورس کی جانب سے ایچ ون بی (H-1B) اور پرم پروگرامز میں مبینہ ویزا و لیبر فراڈ کی تحقیقات کے سلسلے میں اٹھایا گیا ہے۔ امریکی شعبہ محنت کے انسپکٹر جنرل اینتھونی ڈی ایسپوزیٹو نے اس کارروائی کا باقاعدہ اعلان کرتے ہوئے واضح کیا کہ امریکی افرادی قوت کو درپیش خطرات کو کسی صورت برداشت نہیں کیا جائے گا اور خلاف ورزی کرنے والوں کے خلاف سخت قانونی کارروائی کی جا رہی ہے۔

پرم (PERM) کی اس معطلی کے باعث کگنیزنٹ آئندہ کے لیے اپنے غیر ملکی ملازمین کی مستقل سکونت (گرین کارڈ) کے لیے نئی درخواستیں جمع نہیں کروا سکے گی۔ تاہم حکام نے وضاحت کی ہے کہ اس فیصلے سے کمپنی کے موجودہ ایچ ون بی (H-1B) ویزوں پر یا جن ملازمین کی پرم منظوری پہلے ہی مکمل ہو چکی ہے ان پر فوری طور پر کوئی اثر نہیں پڑے گا۔ آئی ٹی انڈسٹری کی بڑی کمپنیوں پر اس قسم کے کریک ڈاؤن سے امریکہ میں مقیم غیر ملکی و بالخصوص ایشیائی ہنر مندوں کے لیے ویزا اور گرین کارڈ کے حصول کے عمل میں رکاوٹیں بڑھنے کا اندیشہ ظاہر کیا جا رہا ہے۔