ایران امریکی جہازوں کو نشانہ بنائے گا تو اپنے ٹینکرز سے ہاتھ دھونا پڑے گا، روبیو

امریکی وزیرِ خارجہ مارکو روبیو نے ایران کو سخت ترین نتائج کی خبردار کرتے ہوئے واضح الفاظ میں کہا ہے کہ اگر تہران نے امریکی بحری جہازوں یا تجارتی نقل و حرکت کو نشانہ بنانے کی کوشش کی تو اسے اپنے تجارتی اور خام تیل بردار ٹینکرز سے مکمل طور پر ہاتھ دھونا پڑے گا۔ جنوبی امریکی ملک کولمبیا کے دارالحکومت میں صحافیوں سے بات چیت کرتے ہوئے مارکو روبیو نے امریکی سینٹرل کمانڈ (سینٹ کام) کی جانب سے 5 ایرانی آئل ٹینکرز کی تباہی کے اقدام کا دفاع کیا اور واشنگٹن کی سیکیورٹی پالیسی کو دوٹوک انداز میں پیش کیا۔

امریکی وزیرِ خارجہ نے زور دے کر کہا کہ امریکی جنگی جہازوں اور خطے میں بین الاقوامی سمندری گزرگاہوں پر ایرانی بیلسٹک میزائل یا ڈرون حملوں کی کوششوں کے ردِعمل میں امریکہ ایرانی تیل بردار جہازوں اور ان کے معاشی اثاثوں کو مسلسل نشانہ بناتا رہے گا۔ ان کا کہنا تھا کہ امریکہ اپنے دفاعی حقوق، تجارتی آزادی اور سیکیورٹی فورسز کے تحفظ کے لیے مکمل طور پر پرعزم ہے اور پاسدارانِ انقلاب کی جانب سے کسی بھی اشتعال انگیزی یا جارحیت کا جواب دینے سے بالکل نہیں ہچکچائے گا۔