امریکی سینٹرل کمانڈ کی ایران کے 3 آئل ٹینکرز کو نشانہ بنانے کی تصدیق

واشنگٹن: امریکی سینٹرل کمانڈ (CENTCOM) نے خلیجِ عمان اور جزیرہ خارگ کے قریب ایران کے 3 آئل ٹینکرز کو بیلسٹک میزائل حملوں کے جواب میں نشانہ بنانے اور تباہ کرنے کی باضابطہ تصدیق کر دی ہے۔

سینٹ کام کی جانب سے جاری کردہ بیان کے مطابق امریکی افواج نے کارروائی کرتے ہوئے جزیرہ خارگ کے قریب ایرانی آئل ٹینکر ‘ڈاؤنی’ کو ناکارہ بنایا، جبکہ جاسک کے قریب آئل ٹینکر ‘اسٹارک 1’ کو تباہ کر دیا۔ اس کے علاوہ خلیجِ عمان میں موجود تیسرے ایرانی آئل ٹینکر ‘نوکسن’ کو بھی کارروائی میں تباہ کر دیا گیا۔ امریکی ملٹری حکام کا دعویٰ ہے کہ یہ تینوں آئل ٹینکرز پاسدارانِ انقلاب (IRGC) کے اربوں ڈالر پر مشتمل خفیہ مالیاتی اور تجارتی نیٹ ورک کا حصہ تھے، جو گرے مارکیٹ میں تیل کی نقل و حمل کے لیے استعمال ہوتے تھے۔

سینٹ کام نے موقف اپنایا کہ یہ کارروائی ایران کی جانب سے 2 امریکی جنگی بحری جہازوں کو بیلسٹک میزائلوں سے نشانہ بنانے کی ناکام کوشش کے بعد جواباً کی گئی۔ امریکی فوج کے مطابق تمام ایرانی حملوں کو کامیابی سے ناکام بنا دیا گیا اور امریکی فوج کا کوئی اہلکار ہلاک یا زخمی نہیں ہوا۔ امریکی کمانڈ نے سخت تنبیہ جاری کرتے ہوئے خبردار کیا کہ اگر امریکی بحری جہازوں یا عملے کو نشانہ بنایا گیا تو ایران کو اس کی سنگین قیمت چکانی پڑے گی اور ضرورت پڑنے پر ایران کے باقی ماندہ آئل فلیٹ کو بھی تباہ کر دیا جائے گا۔