امریکا کی اقتصادی جنگ کا مقابلہ کرنے کا منصوبہ تیار کرلیا: ایرانی نائب صدر

تہران: ایران کے فرسٹ وائس پریذیڈنٹ (نائب صدر) محمد رضا عارف نے اعلان کیا ہے کہ ایرانی حکومت نے امریکہ کی جانب سے مسلط کردہ معاشی پابندیوں اور اقتصادی جنگ کا کامیابی سے مقابلہ کرنے کے لیے ایک جامع منصوبہ تیار کر لیا ہے اور دشمن کو اس محاذ پر بھی شکست ہوگی۔

ایرانی دارالحکومت میں گفتگو کرتے ہوئے محمد رضا عارف نے کہا کہ ملک کو درپیش معاشی چیلنجز اور غیر ملکی دباؤ سے نپٹنے کے لیے تمام ضروری تدابیر کو حتمی شکل دے دی گئی ہے۔ ان کا کہنا تھا کہ ایران اپنی معاشی خودمختاری کا دفاع کرنے اور اقتصادی استحکام کو برقرار رکھنے کے لیے پوری طرح تیار ہے۔

نائب صدر نے متنبہ کیا کہ مخالفین اور بیرونی طاقتیں ایرانی حکومت اور عوام کے درمیان موجود اعتماد اور سماجی ہم آہنگی کو نقصان پہنچانے کی ناکام کوششیں کر رہی ہیں۔ انہوں نے زور دیا کہ موجودہ حالات میں قومی یکجہتی، عوامی اعتماد اور اجتماعی ہم آہنگی کا تحفظ ریاست کی اولین ترجیح ہے جس کے ذریعے معاشی دباؤ کا مؤثر مقابلہ کیا جائے گا۔