آئی ایم ایف کی ہدایت پر بجلی سبسڈی میں 143 ارب کی کمی

بین الاقوامی مالیاتی فنڈ (آئی ایم ایف) نے پاکستان میں بجلی کی سبسڈی میں 143 ارب روپے کی کمی کرتے ہوئے سرکلر ڈیٹ کے سالانہ بہاؤ کا ہدف 400 ارب روپے مقرر کر دیا ہے۔ آئی ایم ایف کے مطابق یہ ہدف بہتر کارکردگی، بلوں کی وصولیوں میں اضافہ اور لائن لاسز میں کمی کی بنیاد پر رکھا گیا ہے۔

رپورٹ میں بتایا گیا کہ رواں مالی سال کے لیے بجلی کی سبسڈی کو 1.04 ٹریلین روپے سے کم کرکے 893 ارب روپے تک محدود کیا گیا ہے، جو مجموعی قومی پیداوار (جی ڈی پی) کا تقریباً 0.7 فیصد بنتا ہے۔ اس کے ساتھ سہ ماہی ٹیرف ایڈجسٹمنٹ اور ماہانہ فیول پرائس ایڈجسٹمنٹ کو بروقت نافذ کر کے دباؤ قابو میں رکھا جائے گا۔

دوسری جانب اقتصادی رابطہ کمیٹی (ای سی سی) نے رواں مالی سال کے لیے سرکلر ڈیٹ کے بہاؤ کا ہدف 522 ارب روپے منظور کیا، جس میں 400 ارب روپے بجٹ سے اور باقی 122 ارب روپے سرکلر ڈیٹ ری فنانسنگ اسکیم کے تحت ادا کیے جائیں گے۔ پاور ڈویژن کے ترجمان کے مطابق آئی ایم ایف اور پاور ڈویژن کے درمیان کوئی اختلاف نہیں ہے، تاہم آئی ایم ایف کی اسٹاف رپورٹ میں 522 ارب روپے کے ہدف کو تسلیم نہیں کیا گیا۔

ذرائع کے مطابق پاور ڈویژن نے سبسڈی میں کمی اور سرکلر ڈیٹ کے کم ہدف کی آئی ایم ایف تجاویز کی ابتدا میں مزاحمت کی تھی، لیکن حکومت نے ای سی سی کے ذریعے نیاسرکلر ڈیٹ مینجمنٹ پلان منظور کر کے اس پر عملدرآمد شروع کر دیا ہے۔