شدید دھند کے باعث موٹر وے کے مختلف سیکشنز ٹریفک کے لیے بند، شہریوں کو دن کے وقت سفر کی ہدایت

موٹر وے پولیس نے شدید دھند اور حد نگاہ صفر ہونے کی وجہ سے موٹر وے کے مختلف سیکشنز کو ٹریفک کے لیے بند کر دیا ہے۔ ترجمان موٹر وے پولیس، سید عمران احمد کے مطابق موٹر وے ایم 3 فیض پور انٹر چینج سے جڑانوالہ تک، ایم 4 پر گوجرہ سے عبدالحکیم تک اور لاہور-سیالکوٹ موٹر وے ایم 11 کو دھند کی شدت کے باعث بند کر دیا گیا ہے۔

ترجمان نے خبردار کیا کہ دھند میں لین کی خلاف ورزی سنگین حادثات کا باعث بن سکتی ہے، لہٰذا ڈرائیور حضرات کو لین ڈسپلن کی سختی سے پابندی کرنے کی ہدایت دی گئی ہے۔ شہریوں کو مشورہ دیا گیا کہ دن کے اوقات یعنی صبح 10 بجے سے شام 6 بجے تک سفر کریں، فوگ لائٹس استعمال کریں، تیز رفتاری سے گریز کریں اور آگے چلنے والی گاڑی سے مناسب فاصلہ رکھیں۔

موٹر وے پولیس نے غیر ضروری سفر سے اجتناب کی اپیل کرتے ہوئے ہدایت کی کہ رہنمائی یا مدد کے لیے ہیلپ لائن 130 پر رابطہ کیا جا سکتا ہے۔