ملک کے بالائی علاقوں میں بارش و برف باری کا امکان، این ڈی ایم اے کی ایڈوائزری جاری

نیشنل ڈیزاسٹر منیجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے 14 سے 18 دسمبر 2025 کے دوران ملک کے بالائی علاقوں میں بارش اور برف باری کی پیشگوئی کرتے ہوئے ایڈوائزری جاری کر دی ہے۔

این ڈی ایم اے کے مطابق بالائی خیبر پختونخوا، کوہستان، گلگت بلتستان، آزاد جموں و کشمیر اور بلوچستان کے مختلف علاقوں میں 14 سے 15 دسمبر کے دوران مغربی ہواؤں کے اثرات سے بارش اور برف باری متوقع ہے۔ ممکنہ موسمی صورت حال کے باعث دھند کی شدت میں بھی اضافہ ہو سکتا ہے۔ میدانی علاقوں میں ہلکی سے درمیانی بارش جبکہ پہاڑی اور بالائی علاقوں میں شدید برف باری کا امکان ہے۔

این ڈی ایم اے نے بتایا کہ برف باری کے باعث پہاڑی راستوں پر ٹریفک کی روانی متاثر ہو سکتی ہے اور بعض مقامات پر سڑکیں بند ہونے کا خدشہ ہے۔ کوئٹہ، زیارت اور شمال مغربی بلوچستان کے بعض علاقوں میں ہلکی بارش اور پہاڑی علاقوں میں برف باری متوقع ہے۔ 16 سے 18 دسمبر کے دوران برف باری کی شدت میں کمی کا امکان ہے لیکن سردی کی شدت برقرار رہے گی، اور سڑکوں پر پھسلن کے باعث ٹریفک متاثر ہو سکتا ہے۔

نیشنل ایمرجنسی آپریشن سینٹر نے سیاحوں اور مسافروں سے درخواست کی ہے کہ غیر ضروری سفر سے گریز کریں اور مقامی انتظامیہ کی ہدایات پر عمل کریں۔ این ڈی ایم اے ممکنہ موسمی خطرات کے حوالے سے متعلقہ اداروں کو پیشگی آگاہی بھی فراہم کر رہا ہے۔