واٹس ایپ ہیکنگ کے بڑھتے واقعات، این سی سی آئی اے کی اہم ایڈوائزری جاری

پاکستان میں واٹس ایپ ہیک ہونے کے بڑھتے واقعات کے پیشِ نظر نیشنل سائبر کرائم انویسٹی گیشن ایجنسی (این سی سی آئی اے) نے شہریوں کے لیے اہم ایڈوائزری جاری کر دی ہے۔

ایڈوائزری کے مطابق اگر کسی صارف کو شک ہو کہ اس کا واٹس ایپ ہیک ہو گیا ہے یا واٹس ایپ اکاؤنٹ تک رسائی ممکن نہیں رہی تو فوری طور پر واٹس ایپ ایپلیکیشن دوبارہ انسٹال کی جائے اور اپنے فون نمبر کے ذریعے دوبارہ رجسٹریشن کی جائے۔

این سی سی آئی اے کے مطابق نئے واٹس ایپ پر لاگ اِن ہونے کے لیے صارف کو اپنا موبائل نمبر درج کرنا ہوگا، جس کے بعد ایس ایم ایس کے ذریعے 6 ہندسوں کا تصدیقی کوڈ موصول ہوگا۔ یہ کوڈ فوری طور پر درج کرنے سے ہیکر کے موبائل سے واٹس ایپ اکاؤنٹ خود بخود لاگ آؤٹ ہو جائے گا۔

ایڈوائزری میں واضح کیا گیا ہے کہ واٹس ایپ ایک وقت میں صرف ایک ہی موبائل فون پر فعال رہ سکتا ہے، اس لیے اصل صارف کی دوبارہ لاگ اِن کے بعد غیر مجاز رسائی ختم ہو جاتی ہے۔

این سی سی آئی اے نے شہریوں کو ہدایت کی ہے کہ مشکوک لنکس پر کلک کرنے، غیر معروف کالز یا پیغامات میں موصول ہونے والے کوڈز شیئر کرنے سے گریز کریں تاکہ سائبر فراڈ سے بچا جا سکے۔