لیاری کے خلاف بھارتی پروپیگنڈے کا جواب، سندھ حکومت کا ’میرا لیاری‘ فلم ریلیز کا اعلان

بھارت کی جانب سے لیاری کے خلاف مبینہ منفی پروپیگنڈے کے جواب میں سندھ حکومت نے ’’میرا لیاری‘‘ کے نام سے فلم ریلیز کرنے کا اعلان کر دیا ہے۔ بھارتی فلم دھرندھر میں لیاری کو تشدد سے جوڑنے کی کوشش کے بعد پاکستان میں اس کا جواب ثقافتی اور مثبت بیانیے کے ذریعے دیا جا رہا ہے۔

صوبائی وزیر اطلاعات شرجیل انعام میمن نے بتایا کہ فلم میرا لیاری کی تیاری میں سندھ حکومت نے مکمل معاونت فراہم کی ہے اور یہ فلم جنوری کے پہلے ہفتے میں ریلیز کر دی جائے گی۔ ان کا کہنا تھا کہ فلم کو بین الاقوامی سطح پر بھی نمائش کے لیے پیش کیا جائے گا۔

شرجیل میمن نے کہا کہ جنگ میں بھارت کو عبرت ناک شکست ہوئی اور وہ فلموں کے ذریعے اپنی ہار کو جیت میں تبدیل نہیں کر سکتا۔ انہوں نے بھارتی فلم دھرندھر کو پاکستان اور بالخصوص لیاری کے خلاف منفی پروپیگنڈا قرار دیتے ہوئے کہا کہ لیاری تشدد نہیں بلکہ ثقافت، امن، صلاحیت اور حوصلے کی علامت ہے۔

ان کا کہنا تھا کہ فلم میرا لیاری لیاری کا اصل چہرہ دنیا کے سامنے لائے گی، جس میں امن، خوشحالی، ثقافتی ورثے اور عوامی فخر کو اجاگر کیا جائے گا۔

واضح رہے کہ حال ہی میں بھارت میں پروپیگنڈا فلم دھرندھر ریلیز کی گئی تھی جس میں رنویر سنگھ، اکشے کھنہ، آر مدھون، ارجن رام پال اور سنجے دت سمیت دیگر اداکاروں نے مرکزی کردار ادا کیے۔