حکومت نے دھرنے موخر کرنیکا کہا، دھرنے بھی چلیں گے اور مذاکرات بھی: حافظ نعیم الرحمٰن

منصورہ لاہور میں حکومتی وفد نے امیر جماعت اسلامی حافظ نعیم الرحمان سے اہم ملاقات کی، جس میں وفاقی وزیر احسن اقبال، رانا ثنا اللہ اور خواجہ سلمان رفیق شامل تھے۔ حکومتی وفد نے جماعت اسلامی سے ملک گیر دھرنے موخر کرنے کی درخواست کی، جسے رد کرتے ہوئے امیر جماعت اسلامی حافظ نعیم الرحمان نے واضح کیا کہ عوام کو ریلیف ملنے تک دھرنے اور مذاکرات دونوں ایک ساتھ جاری رہیں گے۔ انہوں نے مطالبات کے جائزے کے لیے لیاقت بلوچ کی سربراہی میں ایک مذاکراتی کمیٹی بھی تشکیل دے دی ہے۔

ملاقات کے بعد میڈیا سے گفتگو کرتے ہوئے وفاقی وزیر احسن اقبال اور رانا ثنا اللہ نے کہا کہ امریکہ-ایران کشیدگی اور آبنائے ہرمز کی بندش کے باعث عالمی سطح پر پٹرولیم اور توانائی بحران کا سامنا ہے، جس کا بوجھ عام آدمی پر پڑا ہے۔ تاہم، جماعت اسلامی نے واضح کیا کہ عوام مہنگائی سے شدید متاثر ہیں، حکومت آئی پی پیز کے معاہدو، کیپیسٹی پیمنٹس اور پٹرولیم لیوی کا بوجھ غریب پر نہ ڈالے۔ حافظ نعیم الرحمان نے مطالبات پیش کرتے ہوئے کہا کہ حکومت فوراً پٹرولیم لیوی ختم کرے، پٹرول اور روٹی کی قیمتیں کم کر کے عام شہری کو ریلیف فراہم کرے۔