قادری ہاؤس چھاپہ: خواتین پر تشدد اور گھریلو سامان اٹھانے کا الزام، ثروت اعجاز قادری کا ملک گیر احتجاج کا عندیہ

سربراہ پاکستان سنی تحریک انجینئر ثروت اعجاز قادری نے قادری ہاؤس پر پولیس چھاپے کے بعد میڈیا سے گفتگو کرتے ہوئے الزام عائد کیا ہے کہ کارروائی کے دوران ان کے اہلِ خانہ کی حرمت پامال کی گئی اور خواتین پر تشدد کیا گیا۔

ثروت اعجاز قادری کا کہنا تھا کہ ہم نے ہمیشہ دہشت گردی کی کھل کر مذمت کی ہے اور فتنۂ خوارج کے خلاف ہمارے بڑوں نے بے شمار قربانیاں دی ہیں۔ انہوں نے کہا کہ ہم نے جنازے اٹھائے ہیں، شہیدوں کے بیٹے آج بھی یہاں موجود ہیں، ایسے میں ہمارے ساتھ یہ سلوک سراسر ناانصافی ہے۔

انہوں نے دعویٰ کیا کہ پولیس کارروائی کے دوران قادری ہاؤس میں داخل ہوتے ہوئے پانچ کے قریب موبائل فون اور دیگر گھریلو اشیاء اٹھا لی گئیں۔ ثروت اعجاز قادری نے مطالبہ کیا کہ چھاپے میں ملوث پوری ٹیم کے خلاف فوری کارروائی کی جائے۔

ان کا کہنا تھا کہ اگر مطالبات تسلیم نہ کیے گئے تو کل سے پورے ملک میں احتجاج ریکارڈ کرایا جائے گا۔ تاہم انہوں نے کارکنان سے اپیل کی کہ وہ پرامن رہیں، ہم پہلے بھی پرامن تھے اور آئندہ بھی پرامن رہیں گے، مگر اگر ماؤں اور بہنوں کی عزت کا معاملہ آیا تو خاموشی ممکن نہیں۔

ثروت اعجاز قادری نے ریاستی اداروں کا شکریہ بھی ادا کیا جنہوں نے فوری رابطہ کر کے تعاون کی یقین دہانی کرائی۔