ایران سے کشیدگی، امریکا نے مشرق وسطیٰ میں فوجی تعیناتی بڑھا دی

ایران کے ساتھ جاری شدید کشیدگی کے تناظر میں امریکہ نے مشرقِ وسطیٰ میں اپنی فوجی تعیناتی کی مدت میں 2027 تک توسیع کر دی ہے۔ وال اسٹریٹ جرنل کے مطابق امریکی وزیرِ دفاع پیٹ ہیگستھ نے خطے میں تعینات تقریباً 50 ہزار امریکی فوجیوں کی موجودگی برقرار رکھنے کی منظوری دی ہے، جہاں بحری، فضائی اور دیگر دفاعی یونٹس ایرانی میزائلوں کو روکنے، تجارتی جہازوں کی حفاظت اور آبنائے ہرمز میں کارروائیوں سمیت مختلف مشنز انجام دیتے رہیں گے۔ رپورٹ میں انتباہ ظاہر کیا گیا ہے کہ اس طویل تعیناتی سے امریکی فوجی وسائل اور تیاری پر دباؤ بڑھ سکتا ہے۔ دوسری جانب برطانوی خبر ایجنسی کے مطابق ٹرمپ انتظامیہ کی کوشش ہے کہ نومبر کے مڈٹرم انتخابات تک ایران پر اقتصادی دباؤ بڑھایا جائے تاکہ انتخابی نتائج متاثر نہ ہوں، جبکہ انتخابات کے بعد ایران کے خلاف فوجی کارروائیوں میں شدت کا امکان ظاہر کیا گیا ہے۔