کوئٹہ: نواب ثناءاللہ زہری کا جنرل فیض حمید کے کورٹ مارشل پر ردعمل

سابق وزیراعلیٰ بلوچستان نواب ثناءاللہ خان زہری نے جنرل فیض حمید کے خلاف کورٹ مارشل کے فیصلے پر ردعمل دیتے ہوئے کہا ہے کہ سابق وزیراعظم میاں نواز شریف کے ساتھ کھڑے رہنے کی وجہ سے ان کی منتخب حکومت ختم کی گئی۔ انہوں نے دعویٰ کیا کہ بلوچستان حکومت گرانے میں سیاسی نہیں بلکہ “فیضی تحریکِ عدم اعتماد” لائی گئی، جس میں جنرل فیض حمید کے ساتھ جنرل باجوہ بھی برابر کے شریک تھے۔

نواب ثناءاللہ زہری نے کہا کہ منتخب جمہوری حکومت گرانے پر باجوہ، فیض حمید اور ان کے ماتحت افسران کے خلاف آرٹیکل 6 کے تحت کارروائی ہونی چاہیے۔ ان کا کہنا تھا کہ سیاسی انجینئرنگ پر فوجی عدالت میں تمام شواہد کے ساتھ پیش ہونے کو تیار ہوں

انہوں نے سزا و جزا کے دوہرے معیار پر سوال اٹھاتے ہوئے کہا کہ سیاستدانوں کو سزائے موت اور فیض حمید کو 14 سال قید با مشقت دینا ناانصافی ہے۔ انہوں نے مزید کہا کہ سیاسی مداخلت کے باعث بلوچستان میں امن و امان کی صورتحال متاثر ہوئی، تاہم سزا و جزا کا حالیہ عمل شفاف ہے جسے قوم قدر کی نگاہ سے دیکھ رہی ہے۔