بینچ اور بار کے تعاون کے بغیر عدالتی اصلاحات کامیاب نہیں ہوسکتیں: چیف جسٹس

کوئٹہ: چیف جسٹس آف پاکستان جسٹس یحییٰ آفریدی نے تاکید کی ہے کہ بینچ اور بار کے باہمی اور مضبوط تعاون کے بغیر ملک میں عدالتی اصلاحات کبھی کامیاب نہیں ہو سکتیں۔

بلوچستان ہائیکورٹ میں منعقدہ ایک تقریب سے خطاب کرتے ہوئے چیف جسٹس یحییٰ آفریدی نے کہا کہ ملک کے عدالتی نظام کو صرف عدالتوں تک محدود رکھنے کے بجائے شہریوں اور سائلین کی ضروریات کے گرد مرکوز کرنا ہوگا تا کہ انصاف کے حصول کے لیے عدالتوں کا رخ کرنے والے شہریوں کو غیر ضروری مشکلات اور التوا کا سامنا نہ کرنا پڑے۔ ان کا کہنا تھا کہ ٹیکنالوجی محض ایک ذریعہ ہے جبکہ حقیقی مقصد سائلین کو سستا اور شفاف انصاف فراہم کرنا ہے، اسی لیے عدالتی امور میں جدید ٹیکنالوجی کا استعمال انصاف کی فراہمی کو تیز تر بنانے کے لیے کیا جانا چاہیے۔

چیف جسٹس آف پاکستان نے مزید کہا کہ بلوچستان کے دور دراز اور پس ماندہ علاقوں میں محدود وسائل اور درپیش سکیورٹی چیلنجز کے باوجود انصاف کی فراہمی کا عمل جاری ہے جو قابلِ ستائش ہے۔ انہوں نے واضح کیا کہ عام عوام کو ان کی دہلیز پر بروقت اور آسان انصاف فراہم کرنا عدلیہ کی بنیادی ذمہ داری ہے اور اس مقصد کے حصول کے لیے تمام متعلقہ فریقین کو ایک پیج پر آ کر مشترکہ کاوشیں کرنا ہوں گی۔