قائمہ کمیٹی کا بیوروکریسی کی ناکامی پر شدید تشویش کا اظہار، سی ڈی اے اور ڈی جی ہیلتھ کی کارکردگی پر برہمی

اسلام آباد: پارلیمانی قائمہ کمیٹی نے بیوروکریسی کی ناکامی پر شدید تشویش کا اظہار کرتے ہوئے چیئرمین سی ڈی اے (CDA)، ڈی جی ہیلتھ، اسلام آباد ہیلتھ کیئر ریگولیٹری اتھارٹی (IHRA) اور سول ڈیفنس کی کارکردگی اور عدم توجہی پر شدید عدم اطمینان ظاہر کیا ہے۔

کمیٹی کے اجلاس کے دوران اختتامی ریمارکس دیتے ہوئے چیئرمین قائمہ کمیٹی نے کہا کہ بیوروکریسی اور متعلقہ ادارے اپنی آئینی و قانونی ذمہ داریوں کی ادائیگی میں مکمل طور پر ناکام رہے ہیں۔ انہوں نے افسوس کا اظہار کرتے ہوئے کہا، “سیاستدانوں کا احتساب تو فوراً ہو جاتا ہے لیکن بیوروکریٹس کو کون پوچھے گا؟” چیئرمین نے واضح کیا کہ قائمہ کمیٹی سی ڈی اے سمیت تمام متعلقہ اداروں کی کارکردگی اور جواب دہی کا تفصیلی جائزہ لے گی تا کہ اداروں کی سستی کا خاتمہ ممکن بنایا جا سکے۔

اجلاس کے اختتام پر چیئرمین کمیٹی نے زور دیا کہ اسلام آباد اور ملک بھر کے لیے ایک جامع اور یکساں ہیلتھ پالیسی تشکیل دی جائے۔ انہوں نے عزم ظاہر کیا کہ مستقبل میں ملک بھر سے اس قسم کے ناخوشگوار واقعات کی روک تھام اور عوامی تحفظ کو یقینی بنانے کے لیے ہر سطح پر ٹھوس اور سخت اقدامات کیے جائیں گے۔