ترک مسلح افواج کے یوم فتح کی 104ویں سالگرہ، جی ایچ کیو راولپنڈی میں تقریب

راولپنڈی: ترک مسلح افواج کے 104ویں یومِ فتح کی مناسبت سے جنرل ہیڈ کوارٹرز (جی ایچ کیو) راولپنڈی میں ایک پروقار اور پروجوش تقریب کا انعقاد کیا گیا، جس میں پاکستان میں ترکیہ کے سفیر عرفان نذیروغلو نے بطور مہمانِ خصوصی شرکت کی۔

پاک فوج کے شعبہ تعلقاتِ عامہ (آئی ایس پی آر) کے مطابق تقریب کے دوران پاکستان اور ترکیہ کے مابین صدیوں پر محیط برادرانہ تعلقات اور مستحکم باہمی روابط کو اجاگر کیا گیا۔ ترجمان نے کہا کہ پاک ترک تعلقات مشترکہ اقدار، باہمی احترام، اور تاریخ بھر میں ایک دوسرے کے لیے غیر متزلزل حمایت پر مبنی مضبوط بنیادوں پر قائم ہیں۔ تقریب میں موجود شرکاء نے ترک مسلح افواج کی تاریخی بہادری، بے مثال قربانیوں اور خدمات کو زبردست خراجِ تحسین پیش کیا۔

آئی ایس پی آر کے مطابق اس موقع پر پاکستان اور ترکیہ کے درمیان دیرینہ، دفاعی اور تزویراتی (اسٹریٹجک) شراکت داری کو مزید آگے بڑھانے اور ہم آہنگی کو مضبوط بنانے کے مشترکہ عزم کا اعادہ کیا گیا۔ تقریب میں پاک فوج کے اعلیٰ افسران، جمہوریہ ترکیہ کے سفارت خانے کے حکام اور معززین نے بڑی تعداد میں شرکت کی۔ تقریب کے اختتام پر جمہوریہ ترکیہ کے عوام اور وہاں کی مسلح افواج کی ترقی اور سلامتی کے لیے نیک تمناؤں کا اظہار کیا گیا۔