سندھ کے بڑے سرکاری ہسپتالوں میں فائر الارم اور واٹر سپرنکلرز نہ ہونے کا انکشاف

کراچی: حکومتِ سندھ کو جمع کرائی گئی فائر سیفٹی رپورٹ میں صوبے کے 22 اہم ترین سرکاری ہسپتالوں میں آگ سے بچاؤ اور ایمرجنسی انتظامات کے حوالے سے شدید نقائص اور غفلت کا انکشاف ہوا ہے۔

رپورٹ کے مطابق 1750 بستروں پر مشتمل سول ہسپتال کراچی اور 2208 بستروں کے حامل جناح ہسپتال میں فائر ایکسٹنگویشرز تو موجود ہیں لیکن فائر الارم اور واٹر سپرنکلرز سرے سے غائب ہیں، جبکہ دونوں ہسپتالوں کی برقی وائرنگ بھی فوری مرمت طلب ہے۔ این آئی سی ایچ (NICH) میں 135 فائر ایکسٹنگویشرز میں سے 40 خراب نکلے، جبکہ لیاری جنرل ہسپتال، قطر ہسپتال اورنگی اور سعود آباد ہسپتال میں بھی الارم اور سپرنکلرز کا بنیادی نظام موجود نہیں ہے۔ سکھر کے جی ایم ایم سی (GMMC) ہسپتال کے بچوں کے وارڈ کا سیفٹی ایگزٹ بند ملا جبکہ لمس (LUMS) حیدرآباد اور جامشورو میں بھی الارم سسٹم ناپید ہے۔

دوسری جانب رپورٹ میں ایس ایم بی بی (SMBB) ٹراما سینٹر، کورنگی چلڈرن انسٹیٹیوٹ، سیہون انسٹیٹیوٹ اور جیکب آباد انسٹیٹیوٹ کے فائر سیفٹی انتظامات کو تسلی بخش قرار دیا گیا ہے۔ محکمہ صحت کے ذرائع کے مطابق این آئی سی وی ڈی (NICVD)، ایس آئی یو ٹی (SIUT) کراچی و سکھر، خیرپور میڈیکل کالج اور گمبٹ سمیت کئی بڑے اداروں نے فائر سیفٹی کا مکمل ڈیٹا ہی فراہم نہیں کیا، جس پر اعلیٰ حکام نے تشویش کا اظہار کرتے ہوئے فوری اصلاحات کی ہدایت کی ہے۔