اے آئی اگلے سال ‘سُپر ہیومن’ بن کر انسانوں پر حاوی ہو جائے گی: ایلون مسک

معروف ٹیکنالوجی ارب پتی ایلون مسک نے دعویٰ کیا ہے کہ آرٹیفیشل انٹیلی جنس (AI) اگلے سال یا 2027ء کے اختتام تک ڈیجیٹل دنیا کے تقریباً تمام کام انسانوں سے بہتر اور ‘سپرہیومن’ سطح پر انجام دینے کے قابل ہو سکتی ہے۔ سوشل میڈیا پلیٹ فارم ایکس (X) پر ویراسل کے سی ای او گیلرمو راخ کی ایک پوسٹ پر گفتگو کرتے ہوئے ایلون مسک کا کہنا تھا کہ اے آئی کی موجودہ تیز رفتار پیش رفت برقرار رہی تو یہ جلد ہی کوڈنگ، ڈیٹا تجزیہ اور دیگر آن لائن کاموں میں انسانی صلاحیتوں کو پیچھے چھوڑ دے گی، تاہم انہوں نے واضح کیا کہ یہ مرحلہ فی الحال بنیادی طور پر ڈیجیٹل دنیا تک محدود رہے گا اور حقیقی دنیا کے جسمانی کام اس میں شامل نہیں ہوں گے۔ اس بحث کے دوران انہوں نے گوگل کے شریک بانی لیری پیج کا حوالہ بھی دیا جو ایک دہائی قبل اے آئی کے انسانی ہیکنگ سے آگے نکلنے کی پیش گوئی کر چکے ہیں۔ ماہرین نے خبردار کیا ہے کہ اے آئی ماڈلز کے اس خودمختار رویے سے فیوچر میں سائبر سیکیورٹی اور خودکار ہیکنگ کے شدید خطرات بھی جنم لے سکتے ہیں۔