اقوام متحدہ کی عمران خان کی حراست پر شدید تشویش، پاکستان سے فوری اقدامات کا مطالبہ

اقوام متحدہ کی نمائندہ خصوصی برائے انسدادِ تشدد ایلس جل ایڈورڈز نے سابق وزیراعظم عمران خان کی جیل میں مبینہ طور پر غیر انسانی اور نامناسب حالات پر شدید تشویش کا اظہار کرتے ہوئے کہا ہے کہ اگر اطلاعات درست ہیں تو یہ حالات تشدد یا غیر انسانی و ہتک آمیز سلوک کے زمرے میں آ سکتے ہیں۔

ایلس جل ایڈورڈز نے اپنے بیان میں پاکستانی حکام سے مطالبہ کیا ہے کہ عمران خان کی حراست کے حالات کو بین الاقوامی قوانین اور انسانی حقوق کے معیارات کے مطابق یقینی بنایا جائے۔ ان کے مطابق عمران خان کو 26 ستمبر 2023 سے اڈیالہ جیل میں روزانہ 23 گھنٹے تنہائی میں رکھنے کی اطلاعات ملی ہیں، جبکہ بیرونی دنیا تک رسائی بھی انتہائی محدود ہے۔اقوام متحدہ کی نمائندہ کا دعویٰ ہے کہ عمران خان کے سیل کی مستقل کیمروں سے نگرانی کی جا رہی ہے اور سیل میں قدرتی روشنی، مناسب وینٹی لیشن، صفائی اور درجہ حرارت کے مناسب انتظام کی کمی ہے، جس کے باعث عمران خان کو گھٹن، بدبو، کیڑوں، متلی، قے اور وزن میں کمی جیسے مسائل کا سامنا ہے۔ایڈورڈز نے کہا کہ بین الاقوامی قانون کے مطابق طویل یا غیر معینہ مدت تک تنہائی میں رکھنا ممنوع ہے، اور 15 دن سے زائد تنہائی نفسیاتی تشدد کے مترادف سمجھی جاتی ہے۔ انہوں نے مطالبہ کیا کہ عمران خان کی تنہائی فوری طور پر ختم کی جائے اور انہیں مناسب طبی سہولیات فراہم کی جائیں۔انہوں نے مزید کہا کہ حکام عمران خان کے ذاتی معالجین کو بھی ملاقات کی اجازت دیں۔عمران خان کی صحت اور جیل میں سہولیات کے حوالے سے گزشتہ کئی روز سے پی ٹی آئی نے تشویش ظاہر کی ہے، جبکہ حکومتی حلقوں اور پارٹی کے موقف میں مختلف بیانات سامنے آتے رہے ہیں