نابلس میں سیکڑوں اسرائیلی قبضہ گیروں کا حضرت یوسفؑ کے مزار پر حملہ

مقبوضہ مغربی کنارے کے تاریخی شہر نابلس میں سیکڑوں کی تعداد میں صیہونی آباد کاروں نے اسرائیلی عسکری تحفظ میں حضرت یوسف علیہ السلام کے مقدس مزار پر حملہ کر دیا۔ کارروائی کے دوران اسرائیلی فوج نے علاقے کو گھیرے میں لے کر مقامی فلسطینی رہائشیوں کو زبردستی انخلاء پر مجبور کیا، جبکہ متعدد فلسطینی مکانات کو عارضی فوجی بیرکوں میں تبدیل کر کے ان کی چھتوں پر اسنائپرز تعینات کر دیے تاکہ آباد کاروں کی بلا رکاوٹ نقل وحرکت یقینی بنائی جا سکے۔ واضح رہے کہ اسرائیلی آباد کاروں نے اس سے قبل قبلۂ اول مسجدِ اقصیٰ پر بھی دھاوا بول کر بے حرمتی کی تھی۔

دوسری جانب، غزہ کے علاقے میں شدید اسرائیلی بمباری سے تباہ ہونے والی ایک رہائشی عمارت کے ملبے سے غزا سول ڈیفنس کی ٹیموں نے 100 سے زائد شہید فلسطینیوں کی لاشیں برآمد کر لی ہیں۔ یہ کثیر المنزلہ رہائشی عمارت اکتوبر 2023ء میں اسرائیلی فضائی حملے کا نشانہ بنی تھی اور اب جا کر ملبہ ہٹانے پر شہداء کی باقیات ملی ہیں، جن کی اجتماعی نمازِ جنازہ میں ہزاروں شہریوں نے شرکت کی۔