برطانیہ کے عجائب گھروں میں غیر ملکی سیاحوں کا داخلہ مفت

برطانوی حکومت نے ملکی اور غیر ملکی سیاحوں کے لیے قومی عجائب گھروں (میوزیمز) میں بلا معاوضہ داخلے کی پالیسی میں کوئی تبدیلی نہ کرنے اور اسے بلا تفریق برقرار رکھنے کا حتمی فیصلہ کیا ہے۔ یہ فیصلہ کئی ماہ تک حکومت، عجائب گھروں کی انتظامیہ اور سیاحتی شعبے کے ماہرین کے درمیان جاری رہنے والی اعلیٰ سطحی مشاورت کے بعد سامنے آیا، جس کا مقصد غیر ملکی سیاحوں پر داخلہ فیس عائد کر کے آمدن بڑھانے کے امکانات کا جائزہ لینا تھا۔

برطانوی شعبہ برائے ڈیجیٹل، کلچر، میڈیا اینڈ سپورٹس (DCMS) نے تصدیق کی کہ غیر ملکی سیاحوں پر ٹکٹ عائد کرنے سے مقامی سیاحت پر منفی اثرات مرتب ہو سکتے تھے، جس کے باعث مفت داخلے کی روایت کو جاری رکھنے کا فیصلہ کیا گیا۔ واضح رہے کہ انگلینڈ کے 15 قومی عجائب گھروں میں سال 2001ء سے تمام سیاحوں کے لیے مفت داخلہ میسر ہے اور یہ ادارے برطانوی معیشت میں سالانہ ایک ارب پاؤنڈ سے زائد کا حصہ ڈالتے ہیں۔ لندن کے میئر صادق خان، وزیرِ مملکت برائے ثقافت لیزا نینڈی اور برٹش میوزیم کے ڈائریکٹر نیکولس کلینن نے اس فیصلے کا پرجوش خیرمقدم کرتے ہوئے کہا ہے کہ ثقافت تک رسائی سب کا بنیادی حق ہے۔