امریکا کا عراق کے کردستان ریجن کی فوجی امداد ختم کرنے کا منصوبہ

امریکا نے عراق کے کردستان ریجن کو فراہم کی جانے والی فوجی امداد ختم کرنے کا منصوبہ بنا لیا ہے۔ برطانوی میڈیا کی رپورٹ کے مطابق امریکا اور کردستان کے درمیان طے شدہ سیکیورٹی معاہدہ جاری سال ستمبر میں ختم ہو رہا ہے، اور امریکی محکمہ دفاع (پینٹاگون) نے کرد حکام کو مطلع کر دیا ہے کہ اس معاہدے کی تجدید کا کوئی امکان نہیں۔ واضح رہے کہ کرد فورسز کو رواں سال 6 کروڑ 10 لاکھ امریکی ڈالر کی مالی و فوجی امداد موصول ہوئی تھی۔ اس پیش رفت پر ایک کرد رہنما نے تشویش کا اظہار کرتے ہوئے خبردار کیا ہے کہ امریکی امداد کی بندش سے خطے میں طاقت کا شدید خلا پیدا ہو سکتا ہے، جس کے نتیجے میں ایران کے اثر و رسوخ میں مزید اضافہ ہونے کا خدشہ ہے۔