حنا جاوید قتل کیس ہائی پروفائل قرار، خصوصی کمیٹی تشکیل

پراسیکیوشن ڈیپارٹمنٹ پنجاب نے تھانہ سول لائنز کے مشہور حنا جاوید قتل کیس کو ‘ہائی پروفائل’ کیس قرار دیتے ہوئے تفتیش اور موثر پیروی کے لیے سینئر پراسیکیوٹرز پر مشتمل خصوصی کمیٹی تشکیل دے دی ہے۔ پراسیکیوٹر جنرل پنجاب عرفان صادق تارڑ کی ہدایت پر ڈسٹرکٹ پبلک پراسیکیوٹر راولپنڈی میاں عمران رحیم نے ایس پی پوٹھوہار اثر علی، ڈی ایس پی محمد شکیل اور ایس ایچ او آصف سجاد کے ساتھ اجلاس میں کیس کی پیش رفت کا تفصیلی جائزہ لیا۔ ڈسٹرکٹ پراسیکیوٹر نے تفتیشی افسران کو ہدایات جاری کی ہیں کہ مقدمے کو جدید سائنسی بنیادوں پر آگے بڑھایا جائے، تمام شواہد اور تفتیشی پہلوؤں کا باریک بینی سے معائنہ کیا جائے اور کسی بھی اہم شہادت کو نظر انداز نہ کیا جائے۔