پنجاب کے بڑے سرکاری ہسپتالوں کے اطراف فائر ہائیڈرنٹس کی تنصیب کا حکم

وزیراعلیٰ پنجاب کی ہدایات پر پنجاب حکومت نے صوبے کے تمام بڑے سرکاری ہسپتالوں میں آگ سے بچاؤ کے پیشگی انتظامات کو مؤثر بنانے کے لیے اطراف میں فائر ہائیڈرنٹس کی تنصیب کے احکامات جاری کر دیے ہیں۔ ترجمان محکمہ ہاؤسنگ کے مطابق پہلے مرحلے میں صوبے بھر کے 57 سرکاری ہسپتالوں کی فہرست تیار کی گئی ہے، جن میں آر ایچ سی، ٹی ایچ کیو، ڈی ایچ کیو اور دیگر اہم طبی مراکز شامل ہیں۔ تمام واسا ایجنسیوں کو ہسپتالوں کے قریب پہلے سے موجود فائر ہائیڈرنٹس کی فعالیت کا جائزہ لینے اور نئے انفراسٹرکچر کی فوری تنصیب کا ٹاسک سونپ دیا گیا ہے۔ اسلام آباد میں آتشزدگی کے حالیہ افسوسناک واقعے کے بعد یہ اقدام اٹھایا گیا ہے تاکہ ریسکیو 1122 اور متعلقہ اداروں کی مکمل معاونت سے ممکنہ ایمرجنسی میں قیمتی انسانی جانوں کے تحفظ کو یقینی بنایا جا سکے۔