بلوچستان کی صورتحال بارے دفاعی جائزہ اجلاس، سیف سٹی پروجیکٹ فعال کرنے کا فیصلہ

کوئٹہ: بلوچستان کی مجموعی امن و امان کی صورتحال اور ترقیاتی امور سے متعلق کوئٹہ میں دو روزہ 28 واں دفاعی جائزہ اجلاس منعقد ہوا۔ اجلاس کی مشترکہ صدارت وزیراعلیٰ بلوچستان میر سرفراز بگٹی اور کور کمانڈر کوئٹہ نے کی۔

اجلاس میں وفاقی و صوبائی اداروں، انتظامی محکموں اور سیکیورٹی فورسز کے اعلیٰ نمائندگان نے شرکت کی۔ دور رس اجلاس کے دوران صوبے میں امن و استحکام کے قیام، پائیدار ترقیاتی منصوبوں کی بروقت تکمیل اور عوام کی فلاح و بہبود کے لیے مشترکہ اقدامات پر تفصیلی غور کیا گیا۔ اس موقع پر کوئٹہ سمیت بلوچستان کے اہم اور حساس شہروں میں مرحلہ وار بنیادوں پر “سیف سٹی پروجیکٹ” کو فعال کرنے کا اصولی فیصلہ کیا گیا۔

وزیراعلیٰ بلوچستان میر سرفراز بگٹی نے اجلاس سے خطاب کرتے ہوئے کہا کہ ہر تین ہفتے بعد باقاعدگی سے منعقد ہونے والے اس جائزہ اجلاس کا مقصد سابقہ فیصلوں پر عملدرآمد کی پیشرفت کا جائزہ لینا اور درپیش چیلنجز پر قابو پانا ہے۔ انہوں نے زور دیا کہ اس تسلسل کے باعث صوبے میں امن و امان کی بحالی اور نظم و نسق کو بہتر بنانے میں مثبت نتائج حاصل ہو رہے ہیں۔

اجلاس کے اختتام پر رواں ماہ فتنہ الہندوستان کے دہشت گردوں کے خلاف کامیابی سے مکمل کیے گئے انٹیلی جنس بیسڈ آپریشنز (IBOs) پر سیکیورٹی فورسز اور قانون نافذ کرنے والے اداروں کی خدمات اور پیشہ ورانہ مہارت کو زبردست خراجِ تحسین پیش کیا گیا۔