سانحہ پمز پر حکمران طبقہ زیادہ دیر نہیں چھپ سکتا: حافظ نعیم الرحمان

امیر جماعت اسلامی حافظ نعیم الرحمان نے سانحہ پمز پر حکومت اور حکمران اتحاد کو شدید تنقید کا نشانہ بناتے ہوئے کہا ہے کہ ملک میں ہر سانحے کے بعد انکوائری کمیٹیاں بنا دی جاتی ہیں جن کے نتائج صفر رہتے ہیں، لیکن اب جاں بحق ہونے والے معصوم بچوں کا حساب دینا ہوگا اور حقائق کو مزید نہیں چھپایا جا سکتا۔ لاہور میں دھرنے سے خطاب کرتے ہوئے انہوں نے سوال اٹھایا کہ اگر پمز میں سیاست دانوں اور طاقتور لوگوں کے بچے زیرِ علاج ہوتے تو کیا تب بھی ایسے حالات ہوتے؟ حافظ نعیم الرحمان نے پیپلز پارٹی، مسلم لیگ (ن) اور ایم کیو ایم کو تنقید کا نشانہ بناتے ہوئے کہا کہ جماعت اسلامی فارم 47 کے ذریعے نہیں بلکہ عوامی طاقت اور منظم جدوجہد کے ذریعے حقیقی تبدیلی لائے گی۔ انہوں نے مطالبہ کیا کہ تعلیم اور صحت کے بجٹ کا حساب قوم کے سامنے لایا جائے، نیز جماعت اسلامی مہنگائی، پیٹرول لیوی اور آئی پی پیز کے ناجائز معاہدوں کے خلاف اپنی جدوجہد جاری رکھے گی۔