ٹرمپ کا ایران پر مکمل غلبے کا دعویٰ، بڑی فتح جلد حاصل کرنے کی امید ظاہر کردی

واشنگٹن: امریکی صدر ڈونلڈ ٹرمپ نے امریکی میڈیا سے گفتگو کرتے ہوئے دعویٰ کیا ہے کہ امریکا نے شروع ہی سے ایران پر مکمل غلبہ حاصل کر رکھا ہے اور بہت جلد ایران کے خلاف ایک بڑی اور حتمی فتح حاصل کرنے والا ہے۔

ایرانی قیادت کے حوالے سے گفتگو کرتے ہوئے صدر ٹرمپ نے ایرانی سپریم لیڈر مجتبیٰ خامنہ ای سے متعلق جاری افواہوں اور خبروں پر تبادلہ خیال کیا۔ صدر ٹرمپ کا کہنا تھا کہ انہیں نہیں لگتا کہ مجتبیٰ خامنہ ای جاں بحق ہوئے ہیں۔

ٹرمپ کے مطابق مجتبیٰ خامنہ ای کے بائیں بازو اور ٹانگ میں شدید چوٹیں آئی تھیں۔ انہوں نے طنز کرتے ہوئے کہا کہ اگر واقعی انہیں کچھ ہوا ہے تو ایرانی فریق اس حوالے سے بہت عمدہ ڈرامہ کاری کر رہا ہے۔

امریکی صدر نے مزید کہا کہ ایرانی حکام جب بھی کسی معاملے یا معاہدے پر بات کرتے ہیں تو یہی کہتے ہیں کہ حتمی منظوری سپریم لیڈر سے لی جائے گی۔ امریکی صدر کے اس بیان کے بعد مشرقِ وسطیٰ کی کشیدہ صورتحال پر عالمی سطح پر بحث مزید تیز ہو گئی ہے۔