خاتم النبیین حضرت محمد مصطفیٰ ﷺ پوری انسانیت کیلیے رحمت بن کر تشریف لائے، محسن نقوی

وفاقی وزیرِ داخلہ محسن نقوی نے عید میلاد النبی ﷺ کے پرمسرت موقع پر تمام پاکستانی قوم اور امتِ مسلمہ کو مبارکباد پیش کرتے ہوئے کہا ہے کہ خاتم النبیین حضرت محمد مصطفیٰ ﷺ پوری انسانیت کے لیے رحمت بن کر تشریف لائے۔ اپنے خصوصی پیغام میں انہوں نے سیرتِ طیبہ ﷺ کو عملی زندگی کا حصہ بنانے پر زور دیتے ہوئے کہا کہ آپ ﷺ کی بعثت سے ظلمت کا خاتمہ ہوا اور دنیا نے عدل، رحم، سچائی اور ایمانداری کا حقیقی مفہوم پایا۔ محسن نقوی نے کہا کہ دورِ حاضر کے تمام چیلنجز، انتشار اور عالمی بدامنی سے نمٹنے کا واحد حل اسوۂ حسنہ ﷺ کی کامل پیروی میں مضمر ہے۔ انہوں نے قوم پر زور دیا کہ اس بابرکت دن پر ہمیں اپنے انفرادی اور اجتماعی طرزِ عمل کو نبی کریم ﷺ کی تعلیمات، رواداری، اخوت اور انسانیت کی خدمت کے سانچے میں ڈھالنے کا عہد کرنا چاہیے۔