امریکا نے ایران پر حملوں کو پابندیوں میں منتقل کر دیا، مارکو روبیو

امریکی وزیرِ خارجہ مارکو روبیو نے غیر ملکی ہم منصبوں اور اتحادیوں کو آگاہ کیا ہے کہ امریکا ایران کے خلاف اپنی پالیسی کو فوجی حملوں سے معاشی پابندیوں کی مہم میں منتقل کر رہا ہے۔ امریکی نیوز ویب سائٹ کی رپورٹ کے مطابق مارکو روبیو کا کہنا ہے کہ فی الحال امریکا کی جانب سے ایران پر مزید فوجی حملے کیے جانے کی توقع نہیں ہے، بلکہ واشنگٹن کی تمام تر توجہ اب ایران پر دباؤ بڑھانے کے دیگر مؤثر ذرائع پر مرکوز ہے جن میں روان ہفتے اعلان کردہ پابندیوں کی نئی مہم شامل ہے۔ خبر رساں ذرائع کے مطابق وزیرِ خارجہ نے حالیہ دنوں میں اپنے رابطوں کے دوران اتحادی ممالک کو امریکا کے اس فیصلے اور آئندہ کے طریقہ کار سے باضابطہ طور پر مطلع کر دیا ہے۔